Sa kasalukuyan ay tadtad ng batikos ang inaabot  ng Shema dahil sa pagkaantala ng “LOYALTY BONUS”. Hindi na rin natin masisi ang mga members na mainip na o madismaya sa mga pangyayaring gaya nito pero ang nakakalungkot ay may mga members na sa sobrang galit ay nagagawa nang magmura, magbanta o mambatikos.

Inisip ko ano ba ang loyalty bonus na ‘yan at bakit nagkakaganito ang mga taong ito? Ang loyalty bonus ay halagang P12,000 na ibibigay sa sinumang member na nakapag-maintain sa loob ng labing-apat na buwan.

Minsan ay napaisip ako nang ganito; sapat na bang masabing loyal ang isang member dahil nakabili o nakapag-maintain na s’ya ng labing-apat na buwan para gantimpalaan siya ng P12,000? Pero dahil ito na ang napagkasunduan walang dahilan para hindi natin matanggap ang halagang P12,000. Pero sana pahalagahan naman natin ang titulong ito–“LOYALTY BONUS”! Para sa akin kasi ‘pag sinabing Loyal kung saan nanggaling ang salitang “Loyalty” dapat tayo ay walang ibang kinahuhumalingan ibang bagay lalo pa’t ito ay direktang katungali nang iyong kinabibilangan o nangangako rin ng parehong benefisyo, dahilan para mamangka tayo sa dalawang ilog. Magbibigay ako sa inyo ng halimbawa; ang Shema ay may Café del Shema. Kung loyal tayo, ni uminom hindi na sana tayo iinom ng ibang kape. Ako ‘pag hindi available ang Café del Shema hindi na lang ako iinom ng kape kahit alukin pa ako nang libre. Pero kung adik ka talaga sa kape sige uminom ka na, nang iba pero ‘wag ka na lang magbenta ng ibang kape. Pero kung talagang  mahigpit ang pangangailangan, lalo pa ngayong wala pang Harvest at kikita ka naman sa pagbenta ng ibang kape sino naman ang pipigil sa iyo kaya lang ‘wag naman sa loob nang building ng Shema, ‘yong isa pa nga nakita ko partida nag-aalok ng kape habang nakikinig siya ng devotion. Tapos ang lakas ng loob mag-demand ng “LOYALTY BONUS”?! Meron namang iba na member din ng ibang networking tapos sa loob lang din ng Shema nangunguha ng members. Sa tingin n’yo po ba karapat-dapat sila sa “LOYALTY BONUS”? Baka sila pa nga ‘yong mga pasimuno sa paninira sa Shema eh, kasi para sa kanila kung babagsak ang Shema okay lang tutal meron pa naman silang ibang networking.

Kung hindi na natin mababago ang basehan para makamit ang “LOYALTY BONUS”, sana man lang lagyan natin ito ng magandang kabuluhan sa buhay natin sa pamamagitan ng tunay na pagiging “LOYAL” sa Shema. Naniniwala ako na isa rin ito sa hinihintay ng Diyos na makita sa atin para ibuhos na Niya ang masaganang pagpapala na kanyang ipinangako.

Sa mundo ng pananalapi ay may itinuturing na dalawang uri ng income–ang “Active” at “Passive”. Ang “Active Income” ay ang mga income na galing sa trabaho (sweldo), tips, kumisyon, “professional fees” at “talent fees” (Temporary Income) at ‘yon namang “Passive Income” ay ang mga income kahit tumigil ka na sa pagtatrabaho, maaaring nanggagaling ito sa tubo o kita ng iyong mga “investments” at mga “assets” gaya ng paupahang bahay, pension plans o SSS/GSIS/PAG-IBIG (Permanent Income). Dapat ay pareho kang meron n’yan para matustusan mo ang iyong pamumuhay. Dahil ang “active income” ang gagamitin mo para makapagpundar ka ng pagmumulan ng “passive income” mo pagdating ng araw. Sa isang banda ang “passive income” mo naman ang magbibigay ng saysay sa inyong “active income”. “Active Income where you work for money and Passive Income where money works for you.” –  By Robert Kiyosaki

Hayaan ninyong magbigay ako ng ilang halimbawa: kung ikaw ay may “active income” na P100k bawat buwan pero wala ka namang pinupundar na matibay na “passive income” ‘pag dumating ang panahon na huminto ka na sa pagtatrabaho, wala na ring “active income” lahat ng nabili mo mula sa malaking “active income” ay unti-unti ring mauubos at kahit gusto mo pang magkaroon ng biglaang “passive income” hindi na rin ganon ka posible, dahil ang “passive income” ay binubuo sa mahabang panahon.

Hindi maikakaila na mas marami sa atin ang malaki ang ibinibigay na pag-asa at masyadong nakatingin sa “active income” parang dito na umiikot ang kanilang mundo. Parang laging nagmamadaling yumaman. Parang nasa laki ng pumapasok na pera ang kaginhawahang hinahanap. Kulang ang paningin o pagpapahalaga sa paghahanda ng “passive income” kasi sa tingin nila, parang aksaya lang ito nang panahon, masyadong mabagal, minsan ay parang pabigat pa kaya laging pinagpapaliban o hindi pinapansin. Hindi masyadong tinitingnan ang malaking pakinabang sa “passive income” na kung tutuusin nga madalas ay higit pang malaki ang maibibigay kumpara sa “active income”.

Nabanggit ko sa isang article ko na ang papa ko ay dating OFW (Seaman), malaki-laki rin ang “active income” n’ya noon. Nagtangka ring magpa-insure pero dahil nababagalan, at dala na rin ng mga gastusin isama mo na rin ang kakulangan sa malalim na pang-unawa sa tinatawag na “passive income” tumigil na ring maghulog bago pa mag-mature. Buti na lang kahit paano ay obligado siyang maghulog buwan-buwan sa SSS na itinuturing pa nga rin noon na malaking kabawasan sa mga panggastos, na kung pwede sana bawasan na lang ang hulog.  Ngayon retired na ang papa ko, wala na siyang “active income” pero ang SSS na dating parang pabigat ang siya ngayong bumubuhay sa kanya. Sabi pa nga niya ngayon, “sana pala mas malaki ang ibinawas sa akin noon para mas malaki ang tinatanggap ko buwan-buwan ngayon.”

Ano ang kinalaman ng Shema sa usaping “active income” at “passive imcome”? Malaking malaki dahil ang “active at passive income” ay nakapaloob sa programa ng Shema.

Kapag ikaw ay bumili ng produkto ng Shema, ikaw ay nagiging MEMBER, BUSINESS PARTNER AT BENEFICIARY. Bilang member, isa sa maaari mong gawin maliban sa buwanang bumili ay ialok ang ating mga produkto sa iba, lalabas na ikaw ay endorser o ahente ng sarili nating mga produkto. Dahil doon ay may “active income” ka na rin. Mas maraming maniwala, mas maraming bibili, mas malaki ang iyong “rebates” o “commission”. Dahil buwan-buwan kang bumibili, ang P2,520 na iyong pinambili ay magsisilbing buwanang hulog mo na rin sa “mutual funds” na tumutubo ng malaki. Na paglipas ng 16 na buwan (hindi 16 na taon) ay magsisimula ka nang tumanggap ng pension. Kung nagagawa ‘yan ng ibang investment companies, SSS/GSIS/PAG-IBIG kaya ring gawin ‘yan ng Shema, kasi may puhunan, may negosyo, may produkto, may mamimili, may sistema, may programa at may mga matitinong tagapamahala–siempre ang Diyos na Siyang gumagabay sa Shema.

Bagaman sa ibang mga mutual funds nagagawa rin ‘yan pero hindi bababa sa 5 taon ang hihintayin mo bago makita ang tubo ng pera mo, sa SSS/GSIS/PAG-IBIG nga ‘pag nag-retire ka na bago mo pa lang mapapakinabangan ang mga inihulog mo. At higit na malaki ang pension na makukuha mo sa Shema at maliit ang puhunan kumpara sa anumang mutual funds na pwede mong pasukin. Sa mga traditional networking naman, malaki ang “active income” pero wala naman silang programa para sa “passive income”, kaya ‘pag wala nang ma-recruit wala na ring income.

Alalahanin mo ito, kahit gaano kalaki ang “active income” mo ngayon, pansamantala lang ‘yan! Simulan mo nang gamitin ‘yan habang nandiyan pa para magpundar ng pagmumulan ng iyong “passive income”!

Click here to COMMENT

Noong una kong marinig ang pahayag na ito, “Wala nang libre sa mundo!” aminado ako na hindi ko rin agad ito naunawaan. Kasi inisip ko LIBRE ang kaligtasan na bigay ng Diyos sa pamamagitan ni Jesus, pero habang iniisip ko ito nakita ko na ang pahayag ay totoo. Wala nang libre sa mundo! Kung meron man kasi may ibang nagbayad o may nanglibre, lahat ay may katumbas na halaga. Ang kaligtasan ay libre kasi may nagbayad na—si Jesus!

Pero parang hindi pa rin ito tanggap ng maraming Filipino, marami pa rin sa atin ay naghahangad makalibre sa maraming bagay, minsan parang may responsibilidad pa ang mga maykaya para ilibre sila, na kapag hindi sila inilibre ang lumalabas pa sila ang maramot o kuripot. ‘Wag n’yo pong masamain ang nais kong iparating sa inyo. Hindi ko po sinasabing masama ang makalibre kung meron naman talagang manglilibre, ang nais ko lang pong sabihin ay ‘wag nating iasa sa libre ang buhay natin na kapag walang nanglibre o nagbigay ay hindi na natin gagawin ang isang bagay na mahalaga para sa ating kinabukasan.

Subukan n’yo pong tingnan ito ng malaliman, pangkaraniwan na sa ating pagkaunawa na ang Foundation ay itinatag para magbigay ng tulong sa mga piling tao na sakop ng kanilang dahilan bakit sila naitatag. Tama po ‘yan! Nariyan sila talaga para tumulong! Ang hindi natin alam sila ay hindi basta-basta tumutulong sa mga taong hindi karapat-dapat at hindi handang mag-“Participate”. Halimbawa ang isang scholarship foundation alam n’yo ba na hindi lahat ng estudyante tutulungan nila? Kundi ‘yon lamang mga batang nais mag-aral at kayang mag-maintain ng mataas na grades. Ang tawag d’yan ay “Participation” kasi nga naman kahit ipagduldulan mo sa kanila ang tulong mo kung una sa lahat ang estudyante ay ayaw mag-“participate” mauuwi lang lahat sa wala. Ang Gawad Kalinga at Habitat for Humanity na mga foundations na namimigay ng bahay. Pero alam n’yo ba na hindi sila basta-basta “namimigay” ng bahay? Sinusuri muna nilang maigi ang bawat pamilya na pinagkakalooban nila ng ng pabahay. Lingid sa ating kaalaman marami na rin sa mga umasa ng bahay sa kanila ay hindi napagbigyan dahil hindi sila pumasa. Dito sa lugar malapit sa amin may pabahay ang Gawad Kalinga ang mga nabigyan ng pabahay ay kailangan magpa-member muna sa isang samahan na siyang mangangasiwa para matulungan sila ng Gawad Kalinga, kailangan din nilang magbayad, na noong una ay pinagdudahan at pinanghinayangan din nila, ganon pa man may mga nagpatuloy pa rin. ‘Yong mga hindi na nagpatuloy walang nakuhang bahay at ‘yong mga nagpatuloy may bahay na ngayon. Ano ang “participation” nila? Una dapat kang magbayad ng dues sa kanilang local na samahan, ‘pag na-approved na, ikaw ay tutulong sa pagtatayo ng bahay mo, ‘pag tapos na at nakalipat ka na kailangan mong magbayad buwan-buwan hanggang matapos ang utang. ‘Yan ang “participation” kung ayaw nila ‘yan simple lang i-surender nila ang bahay sa nagbigay, para maibigay sa iba na handang mag-“participate”!

Punta naman tayo sa Shema, ito ang dahilan kung bakit may P2,520 na monthly maintainance, kasi dapat may “participation” dahil ‘yan ang tamang takbo ng programa. Kung gusto mo ng masaganang buhay kahit paano dapat may efforts ka, kung gusto mo ng masaganang ani dapat magtanim ka rin, kung gusto mo ng ginhawa sa buhay dapat handa ka ring mag-sacrifice para makamit mo ang ginhawang gusto mo. Kailangan at napakahalaga talaga ng “participation” para tumakbo ang programa nang naaayon sa hinihingi nito.

Sana kung darating ang pagkakataong matutukso kayong questionin uli ang dahilan kung bakit kailangang bumili ng mga produkto buwan-buwan lagi ninyong isipin hindi pwedeng tatanggap na lang tayo nang walang “participation”. Ang P2,520 buwan-buwan ay kailangan pakawalan para matanggap mo ang mas malaking pagpapala na nakalaan sa mga makikibahagi sa program ng Shema.

Minsan ay ininvite ako ng isang kaibigan sa isang pagtitipon sa Cuneta Astrodome, hindi na n’ya sinabi sa akin ang detalye dahil maging siya hindi n’ya alam kung ano talaga ang meron, basta ang sabi n’ya lang may blessing daw. So gaya ng isang pangkaraniwang tao na hindi tumatanggi sa blessing, pumunta naman ako. Pagdating ko doon, ang dami-daming taong nagsisiksikan. Pero nakapasok naman agad ako dahil sinalubong ako nang taong nag-invite sa akin. Marami din akong nakitang kakilala na sobrang excited may isa pa nga nang tanungin ko hindi na nagsalita, sumenyas na lang nang pera. At pumasok na nga kami, blessing din dahil napapwesto pa kami sa malapit sa mga tagapagsalita. Ang gagaling ng mga tagapagsalita mga motivators ang gaganda ng kanilang mga prinsipyo para kumita ng pera. Isa-isa nang ipinakilala ang mga napili nilang leaders, ang binantayan ko lang ay ‘yong naka-assign sa Las Piñas para makausap ko agad.

Iprenesent na nila ang kanilang programa, ayon sa programa nila, kailangan ng isang tao na nagnanais makatanggap ng malaking pera ay maglabas ng $150 bilang tution fee, pero dahil ito ay bahagi ng grand launching nila dito sa Pilipinas, libre ang sasali sa oras na ‘yon. Pero lahat ng kanyang mare-recruit ay magbabayad na ng $150 at doon na siya kikita. Naisip ko kaya kong gawin ‘yon, anyway libre naman sige at kung wala man akong ma-recruit masaya na akong mapag-aralan ang mga ibinibenta nilang lesson materials, principles on how to get rich, kaya pag-uwi na pag-uwi ko kinontak ko agad ‘yong coordinator ng Las Piñas pero hindi ito sumasagot, ipinagtanong ko na s’ya pero talagang hindi na s’ya ma-contact. Malaman-laman ko ayaw na rin pala n’ya at marami sa mga nakita ko doon na kakilala ko ay hindi na rin nagpatuloy. Isa lang ang dahilan, akala daw nila kaya sila nagpunta doon kasi mamimigay ng pera ‘yong nag-invite. Nang malaman nilang kailangan nilang magbayad at mag-recruit nag-ayawan na rin pati mga leaders.

‘Pag naiisip ko ang pangyayaring iyon natatawa pa rin ako, lalo na sa mga pagmumukha ng mga dumalo na sobrang excited na tatanggap ng pera, naimagine ko ang kanilang pagkadismaya.

Alam n’yo po marami pa rin talaga ang ganitong mag-isip. Gusto lang tumanggap pero ayaw magbigay. Gusto ng malaking kita ayaw naman magtrabaho. Gusto ng masaganang buhay ayaw namang magsikap. Gustong mag-ani ayaw namang magtanim.

Ang Shema ay nag-alok ng masaganang kabuhayang at ang tanging “Participation” na hinihingi sa atin ay ang tuloy-tuloy na pagbili ng produkto na nagkakahalaga ng P2,520. Pero alam n’yo ba marami pa rin akong nakakausap—hanggang ngayon at ang kanilang tanong kailangan ba talagang patuloy pa ring bumili? Naisip ko lang, bakit ‘pag ‘yong dating kape kahit nagkakanda nerbyos-nerbyos na tayo bili pa rin tayo ng bili, ni hindi natin inisip na huminto kahit alam natin na minsan masama sa katawan. ‘Yong ilan pa nga ‘pag nag-soft drink parang tubig lang. Kahit alam nilang masama rin sa katawan pero wala silang tinatanong kung dapat bang huminto. Pero ‘pag sa Shema kung kailan nagsimula nang tumanggap ng harvest, loyalty bonus saka maiisip hanggang kailan ba tayo bibili ng products? Nakikiusap ako sa aking kapwa members ‘wag n’yo na pong panghinayangan ang P2,520 n’yo. Lalo pa kung kayo ay nakaabot na sa pang-16 na buwan, kasi kung marunong kayong magkwenta ‘yong ipinangbibili ninyong P2,520 ay hindi na mula sa bulsa ninyo kundi galing na sa Shema, ano pa ang panghihinayangan mo? At habang nagpapatuloy ka mas malaki na ang matatanggap mo at ang nababawas sa iyo ay P2,520 pa rin. Kung nauunawaan mo ang participation mo baka sabihin mo kulang pa pala, sana mas malaki para mas malaki rin ang take home ko. Kaya nga dapat hindi ka lang bumibili sana tumutulong ka rin na ipalaganap ang programa ng Shema.

Bibigyan pa kita ng isang halimbawa, ‘pag ikaw ay natanggap sa trabaho ‘di ba may 6 months probationary period? ‘Yong tinatanggap mong pera d’yan minsan ang tawag pa lang ay allowance. Sa loob ng 6 na buwan sisikapin mong ‘wag maka-absent o makagawa ng hindi ikalulugod ni boss baka hindi ka maging regular. ‘Pag ikaw ay pinalad at natanggap ka ikaw ay regular na! Maliban sa sweldo may mga bunuses, incentives at mga benefits pa. ‘Pag nand’yan ka na sa status na ‘yan mas maluwag na ang kalagayan mo. ‘Pag ikaw ba naging regular hihinto ka na sa pagpasok sa trabaho? Siempre hindi! Lalong mas masarap magtrabaho kasi hindi na lang allowance ang matatanggap mo.

‘Yong anim na buwang probationary period, sa Shema ‘yan ‘yong unang 12 months, ang tanging napapala mo ay ‘yong binili mong products. ‘Pag naka pang-14 ka na dahil regular ka na n’yan may bonus ka na, ‘pag nakaabot ka naman sa pang-16 na buwan, ito na ang magkakasamang sweldo, incentives at benefits. Pero ang lahat ng ‘yan gaya ng isang nagtatrabaho ikaw ay papasok sa office para gampanan ang iyong mga tungkulin. Kung ikaw ay hindi na papasok malamang hindi ka sumuweldo o ‘pag minalas-malas ka pa baka tuluyan ka nang matanggal sa trabaho. Sa Shema ay may ganon ding prisipyo. Ang pinakatrabaho mo o pasok mo sa office ay ‘yong P2,520, ‘pag hindi ka bumili ng produkto ibig sabihin isang buwan kang absent kaya isang buwan kang walang sweldo. Kaya ang tanong na dapat ba tuloy-tuloy akong bibili ng products? Siguro naman alam mo na ang sagot!

Click here to COMMENT